"Orgullo Dcmista" DCM 4-3 Piedrajoya

Un moi mermado, pero extraordinario DCM, vence un encontro dos que fan historia para manterse vivo na pelexa pola permanencia. Os seis valentes convocados, liderados por un fantástico Quique, traballaron sen descanso durante os 50 minutos para derrotar ó segundo clasificado da liga. Os nósos deben sentirse moi orgullosos de sí mesmos, e desfrutar esta victoria. Por desgraza, os rivais directos non ceden e a permanencia continúa estando moi moi cara.

Jorge, Chape, Vare, Quique, Pablo (tocado) e Pani (falto de descanso), foron os artífices do acontencido onte na pista do Berbés (onde tras dous encontros, o equipo mantense invicto). O malestar físico de Pablo antes do inicio do partido, a entrada in-extremis na convocatoria de Pani, e o poderío do rival (segundo clasificado e cun amplo e potente plantel), facían presaxiar unha avultada derrota dos dcmistas que os levaría directos ó pozo da división.
Así pois, o equipo saltou á pista coa intención de cubrir o trámite. A curta convocatoria únicamente deixaba opción a xogar pechados atrás, tentando minimizar o desgaste físico.
Esa situación, provocou (ó igual que na ida) que o rival non atopase a maneira máis axeitada de crear perigo ante a portería de Jorge. O esférico pertencía totalmente ó Piedrajoya, que movía con velocidade e calidade, de banda a banda, desgastando moitísimo ós nósos. Pero comezaban a pasar os minutos e o electrónico non se movía. O DCM foi mellorando sobre a marcha. Encontrou a maneira de que o desgaste fose menor detrás do balón e comezaba a atopar a maneira de crear ocasións illadas. Os desmarques ás costas da defensa, e aproveitar os despistes rivais nos cambios, nos saques de banda... provocados pola sensación de superioridade, foron as armas.
Así chegarían a primeiras ocasións locais. Un par de balóns en longo que Pablo atopaba ás costas de defensa, e un saque de banda de Quique cara a incorporación dende atrás de Vare (tentando imitar o gol de Quique da semana pasada). Foron só avisos, pero que daban esperanzas ós dcmistas.
O rival seguía sen atopar a forma, continuaban cunha posesión estéril do esférico.
E de novo aparecía unha das ocasións illadas do DCM. Quique aparecía por banda dereita do ataque dcmista e con moitísima calidade picaba o balón ante a saída do gardamallas rival facendo o 1-0.
As sensacións seguían sendo as mesmas. O equipo mandaba no electrónico pero semellaba cuestión de tempo que o rival atopase a forma de crear perigo ou que as forzas Dcmistas non deran para aguantar o ritmo. Pero de momento, o DCM seguía traballando.
O rival atoparía un camiño para desatascar o seu ataque colocando un pivot en área rival. O atacante do Piedrajoya, moi superior físicamente ós nósos, anotou no primeiro balón que recibíu. Revolveuse con potencia e Chape pouco tivo que facer. 1-1.
Pero de novo o DCM mellorou sobre a marcha. Foi buscando solucións para solventar eses problemas, e cun bo traballo defensivo tapou esa vía de ataque que atopara Piedrajoya.
E de novo aparecería Quique en xogada illada, para aproveitar un balón rexeitado en primeira instancia pero recollido por Pablo que tocaba para que Quique dentro da área tirase de recursos para conectar un taconazo que coábase na porta rival, 1-2.
O DCM devecía por chegar ó descanso con este marcador, pero no último minuto da primeira metade, De la Cruz sinalaba unha falta na forntal por dubidosas mans de Quique. O atacante disparaba polo lado do porteiro e o balón coábase con fortuna entre as pernas de Jorge, que quedaba tendido no chan doéndose do "baixo ventre" XD. 2-2 e descanso.

O equipo seguíu mellorando cada vez que Piedrajoya atopaba a fórmula para crear perigo. No tramo final da primeira metade, o rival optou por presionar en todo o campo e dificultaba a saída do balón dos dcmistas, quenes tentaban saír con pelotazos, pero a superioridade física dos defensores rivais facía imposible chegar a algún balón por alto. Por iso, o equipo atopou a maneira de saír, raso por banda.
Así quitouse a presión dos últimos minutos de antes do descanso, e asentouse de novo no partido.
A segunda parte comezaba cun xogadón do equipo rosiña. Pablo (enorme no traballo de aguantar o esférico), agardaba ata a chegada de Vare dende atrás aproveitando un gran aclarado de Pani. Vare recibía e tiraba a parede co propio Pani quen devolvía un fermoso balón dentro da área, pero incomprensiblemente o defensa dcmista estragaba a ocasión lanzando fóra.
Perdoaba o DCM e non o facía agora o rival, que aproveitaba un erro na saída dende atrás de Quique e Pani para marcar a placer. 2-3. Semellaba que o partido xa era para o Piedrajoya, que estaba por diante por primeira vez e tiña enfronte a uns dcmistas agotados. Pero os nósos non se conformaron e sen presión algunha seguiron loitando. E pronto conseguirían un importante gol por mediación de Pablo tras xogada persoal dun incombustible Quique, 3-3.
Co empate, o partido foise caldeando tras un pique de Pablo cun defensa rival. De la Cruz, equivocábase para ambos lados segundo a forza das protestas. O partido era xa tolo, de toma e daca por ambos lados. O DCM resistía en defensa cun traballo encomiable a pesares do cansanzo e das dores (como a de Jorge tralo golpe de antes do descanso).
E consecuencia deses rifi rafes, o rival chegaba á 5ª falta. Intres despois, Pani tentaba saír dende atrás co esférico e o rival golpeáballe o xusto para que despois de varias protestas, De la Cruz accedese a pitar a falta e o correspondente doble penalti. Quique asumía a responsabilidade e convertía por baixo. 4-3 e dous minutos para o final.
Aguantou con todo o DCM e o asubío final reconfortou ós Dcmistas polo incrible traballo feito.

Noraboa rapaces. Por vitorias como a de onte merecen a pena os esforzos. Tres puntos vitais para manterse vivos na loita. Agora a pensar no seguinte.
Máis dificultades para os dcmistas, que manteñen todavía as baixas de Yago e Emi para recibir o T.Cahersa, á que podería unirse a de Jorge dependendo do horario do encontro.
As boas novas chegan por outra banda, e é que a directiva xa ten o visto bo do plantel para a incorporación dun novo xogador. O candidato xa está enriba da mesa. Trátase dun xogador con tendencia defensiva, boa planta, serio, comprometido e que xa ten informacións do equipo. Agardemos que o Presidente consega convencelo para a súa incorporación ó proxecto dcmista antes do mércores (día no que se pecha o prazo de fichaxes).
Manterémosvos informados.

"Coa auga ó pescozo" DCM - Piedrajoya

Coa auga ó pescozo, así é como afronta o DCM esta 17º xornada de liga, ó atoparse cos mesmos puntos (16) que os que ten Wapichi (equipo que ocupa un posto de descenso), e é que a pesares da melloría dcmista neste 2012, semella que os nósos non foron os únicos en mellorar, e é que todos os equipos da zona baixa incrementaron o seu rendemento e estan a sacar puntos en todas e cada unha das xornadas poñendo cada vez máis cara a permanencia.

O rival desta semana non semella o máis idóneo para escapar do pozo, xa que estamos a falar do 2º clasificado da categoría, que só cedeu dos empates e dúas derrotas. É ademáis o segundo máximo anotador da liga e xa venceu ós nósos na ida por un apertado 5-4.
Naquel partido, Piedrajoya fora moi superior ós dcmistas na primeira metade, pero non foi quen de superar a poboada defensa dcmista, chegando ó descanso co 1-1. Na segunda metade o partido abríuse e chegaron máis goles. A falta de 30 segundos o DCM conseguía empatar a 4, pero na derradeira xogada, o rival levaba os 3 puntos.

O DCM debe loitar de novo con todas as súas forzas por conseguir sumar. Conta coas baixas de Emi e Yago confirmadas, e probablemente tamén a de Xmon, pero o equipo xa soubo adaptarse a estas baixas durante un par de meses na primeira volta, polo que agardamos que regrese un DCM algo máis rocoso, pero sen dúbida con máis soltura ofensiva e menos erros en defensa que nesa citada primeira volta.
Este equipo sempre respostou en momentos difíciles e agora tocalle facelo unha vez máis. Imos rapaces!

DOMINGO ÁS 11:00 HORAS, PAVILLÓN DO BERBÉS

“Escapan dous puntos moi necesarios” P.Flipper 3-3 DCM

O DCM inicia a segunda volta cun empate que sabe a pouco a pesares de ser ante un rival da zona alta. O equipo deixou escapar novamente unha renda de dous goles, pero o peor foi que dispuxo de tres contragolpes letais nos últimos minutos que incriblemente desperdiciou.

Sobre o papel, encontro moi complicado para que os nósos retomasen a senda do triunfo tralo tropezo ante P.Eloy, pero o partido púxose pronto de cara para os dcmistas, xa que nos primeiros minutos, o gardamallas rival cometía un penalti sobre Emi que él mesmo convertía facendo o 0-1.
Ir por diante no marcador, permitíulle ó DCM facer un partido cómodo, aguantando en defensa e aproveitando as posesións de balón ante un equipo poderoso no ofensivo pero que descoida bastante as tarefas defensivas. Puido ampliar a vantaxe o DCM pero tamén puido empatar o Flipper con varios disparos lonxanos á madeira.

Tralo descanso, o rival comezaba a desesperarse ante o paso dos minutos e as poucas ocasións que eran capaces de crear. O encontro pintaba moi a favor dos rosiñas, pero nun disparo lonxano (segue a permitir demasiados tiros lonxanos sen oposición o equipo), o balón petaba en Vare desviándose o suficiente para sorprender a Jorge. 1-1.
Refaríase moi pronto o DCM cun golazo de Quique quen sorprendía cunha incorporación dende atrás para conectar un potente disparo tras saque de banda. 1-2.
De novo por diante no marcador, retomábase a tónica do partido. Ampliaría a vantaxe o DCM con gol de Pablo, facendo o 1-3, marcador que parecía sentenciar o partido, xa que deixaba moi tocado ó rival.
Pero non soubo xogar entón o DCM eses minutos seguintes, e pronto recurtaba distancias o Pescadería Flipper aproveitando un arriscado intento de saída dende atrás de Emi. 2-3.
O 3-3 chegaba tras un gran barullo na área, con varias intervencións de Jorge pero no terceiro rexeite o balón acababa nas redes.
Non se rendeu o DCM e dispuxo entón das mellores ocasións do partido. Ata tres contragolpes con ampla superioridade numérica foron desperdiciados polos rosiñas. No primeiro, Yago optaba pola opción menos axeitade e disparaba a porta cando levaba dous compañeiros nas bandas. Intres despois Emi saía con moita clase da presión ofensiva do rival e deixaba un gran balón para Yago, quen esta vez sí, buscaba a combinación con Pablo, pero erraba estrepitosamente no pase. E aínda tería unha ocasión máis o DCM, esta vez Chape era o que non atopaba o pase noutro 3 para 1.

Nesas tres accións perdeu o DCM dous puntos moi valiosos que agardemos non bote de menos a final de tempada.
De momento, a liga ponse máis apretada todavía, con varios equipos empatados a 16 puntos e decindo un dos postos de descenso o golaverage. E é que todos os de abaixo queren sacar a cabeza do pozo e dan o seu mellor nivel nas últimas datas. Proba diso, a victoria de Navia ante o líder (que perde o seu primeiro partido) e de Urba ante un Augasa-Mazda que pasa por un momento complicado.

Por se iso fose pouco, as dificultades dcmistas aumentarán para as vindeiras datas, e é que tras contar para este encontro contra P.Flipper con todo o plantel por primeira vez en toda a tempada (e probablemente a última), o equipo terá importantes baixas nas próximas semanas.

Yago regresa a terras catalás e Emi será baixa os dous próximos encontros.
E días despois do regreso de Emi, prevese a marcha de Quique ó extranxeiro ata final de tempada, polo que dende a dirección deportiva tratarán nesta semana a posibilidade de incorporar outro xogador ó plantel. Deberase estudar a necesidade de contar cun home máis no equipo, ver se existe alguén no mercado disposto a incorporarse ó proxecto, e todo isto en tempo record, xa que o mercado de fichaxes péchase en semana e media, o vindeiro mércores 29 de febreiro segundo a regulamentación “O segundo prazo de fichaxes comeza dende o luns posterior á 15º xornada ata o mércores anterior á 18º.
As datas para darse de alta son só de luns a mércores.”

PODEN DESFRUTAR DAS INSTANTÁNEAS DO PARTIDO NO SEGUINTE ENLACE:
https://picasaweb.google.com/102545914651497041447/120219PFlipperDCM?authkey=Gv1sRgCOacr8up272zRA#

GRAZAS A NOSA FOTÓGRAFA E A AFICIÓN PRESENTE NAS BANCADAS!!

"Principia a segunda volta coas aspiracións intactas" P.Flipper - DCM

Transcorridos quince vibrantes encontros, o DCM chega ó inicio da segunda volta coa posibilidade de acadar os seus obxectivos intacta, pero con todo por facer.
O equipo atópase moi vivo na loita pola permanencia, e a pesares do último e doloroso tropezo ante P.Eloy, a situación dos nósos non é de todo mala. Está fóra do descenso con 15 puntos, e semella que este DCM é mellor que o de 15 xornadas atrás.
Ademáis, o outro obxectivo dcmista para esta tempada; a deportividade, tamén é posible, e que as tres tarxetas amarelas recibidas nos primeiros quince partidos, os sitúan como un dos claros favoritos a levar o premio ó equipo máis deportivo da división. Asimesmo, estará tamén na loita por acadar o de campións de campións da deportividade.

Así que outros quince partidos por diante nos que o DCM debe buscar mellorar os quince puntos conseguidos na primeira volta.
Para iso, pode empezar por mellorar o seu rexistro ante un Pescadería Flipper que chega con 22 puntos, 47 goles a favor e outros tantos na contra, e que venceu ós nósos na ida por 4-5, nun encontro no que o rival foi mellor, ante un frouxo DCM que pagaba a súa adaptación á categoría pero que aínda así mantívose moi preto no marcador. E é que o Flipper non é un rival que venza os seus partidos por varios goles de diferenza. Reláxase cando ten enfronte un equipo inferior ou cando está por diante no marcador. Iso debe aproveitalo o DCM, poñer o mono de traballo e loitar dende o primeiro ata o último minuto por rabuñar algún punto.

Para iso, o equipo voltará contar cunha ampla convocatoria, con Yago incluido antes do seu regreso a terras catalás. Nas vindeiras xornadas o equipo volverá quedar Baixo mínimos, coa marcha do citado Yago e cicáis tamén de Emi con permiso do clube. Daquela o clube agarda recuperar a Chape, quen sempre respostou cando o equipo máis o necesitou, pero iso será a semana vindeira.
De momento, todas as miradas postas neste domingo de entroido, ás 16:00h, de novo no pavillón de Lavadores (ó igual que na ida).

Tres puntos moi importantes para escapar das urxencias. Non o perdan!!

“Un esvarón moi inoportuno” P.Eloy 5-4 DCM

Cinco erros defensivos que propiciaron outros tantos goles do rival, condenan a un DCM que semellou ser superior durante moitas fases do encontro, pero que non tivo a fortuna de cara para anotar nos momentos decisivos do choque e permitíu que sí o fixese un P.Eloy ó que lle saíu ás mil marabillas o seu plantexamento do partido.
Con esta derrota, o DCM acaba a primeira volta con 15 puntos, moi preto do descenso (ou incluso metido nel se os equipos de abaixo vencen nos seus encontros pendentes).

Coa intención de mandar no choque e de levar a iniciativa saíu o DCM no partido de onte ante un rival directo. Os primeiros dez minutos foron de total dominio dcmista, cunha presión moi avanzada da que os amarelos non eran capaces de saír. Os nósos pasaron eses dez minutos moi preto da portería rival, tentando perforar a porta con disparos lonxanos, xa que non atopaban outro xeito de penetrar na defensa rival. O encontro pintaba moi de cara para os dcmistas e semellaba que era cuestión de tempo que o electrónico reflexara esa aparente superioridade.
Pero o P.Eloy sabía ó que xogaba, e a pesares de estar un pouco afogados, seguían convencidos da súa estratexia e non ían a cambiar.

Pero superados eses 10 primeiros minutos de acoso Dcmista, comezou o Parquets a atopar a forma de saír en contragolpes cara campo rival. No primeiro deles, Vasco encaraba a Vare e tiráballe un dos seus habituais regates, pero o defensa dcmista caía unha tempada máis na trampa e era superado, quedando só para disparar dende a frontal da área, superando con algo de fortuna a Jorge por debaixo das pernas. 1-0.
Iso só semellaba un pequeno accidente que non debía ir a máis xa que os goles dos nósos tiñan que chegar. Pero nas dúas seguintes contras dos rivais, pases dende a banda cara o medio onde o rematador chegaba antes que o seu marcador e dous novos goles 2-0 e 3-0.
Durísimo golpe para os rosiñas e suculento premio para o plantexamento do Parquets.
Antes do descanso marcaría outra contra máis o Eloy e tan só unha das múltiples aproximacións dcmistas acababa en gol. Anotou Pablo.
4-1 ó descanso.

Na segunda metade, o DCM xogou moito mellor. Moveu o esférico con máis velocidade en ataque, situando dous homes abertos nas bandas, e outro chegando sempre a liña de fondo buscando pases da morte cara atrás. Anotou pronto o 4-2 Yago e a remontada parecía factible.
Pero de novo erraron moitas ocasións e os minutos pasaban sen que o marcador se movese. A fortuna parecía moi esquiva, sobretodo cando Xmon empurraba un balón na mesma liña de gol e éste era repelido in extremis polos defensores rivais.
Máis e máis disparos dos Dcmistas, dos que só dous máis rematarían no fondo das redes (obra de Yago e Pablo), pero eran insuficientes xa que o Parquets xa tiña anotado o seu 5º gol nunha xogada na que Jorge parou en primeira instancia, Xmon sacou o rexeite, e de novo o balón caía en pés do atacante rival quen anotaba o gol decisivo.
Nos minutos finais e con 5-4 no marcador, o DCM reclamou un claro penalti por mans dun defensa pero o colexiado non o apreciou así.

Inoportuno esvarón, dura derrota, pero só unhas horas máis para esquecela, e é que a loita polo obxectivo segue xa esta próxima fin de semana.
Iníciase unha segunda volta na que os nósos deberán mellorar o feito na primeira metade de campionato se queren alcanzar a permanencia.
Imos rapaces! Esta derrota debe fortalecernos máis para os vindeiros encontros!

Felicitar ó Parquets Eloy pola victoria, unha máis nestes xa clásicos partidos cheos de emoción e de igualdade. Agardemos que na última xornada de liga ambos equipos cheguemos cos deberes feitos e podamos disfrutar do encontro dende a permanencia na división. Noraboa!


AS FOTOS DO ENCONTRO NO SEGUINTE ENLACE CORTESÍA DA NOSA FOTÓGRAFA OFCIAL:
https://picasaweb.google.com/102545914651497041447/120212PEloyDCM?authkey=Gv1sRgCOehjPKU4cPTOw

“Con tódolos ingredientes para un partidazo” P.Eloy – DCM

Un dos caprichos do calendario ligueiro deste ano, foi deixar para a última xornada ligueira o xa clásico enfrontamento entre P.Eloy e DCM. Se a tempada pasada tivese ocorrido o mesmo, o último encontro do ano houbese deparado un enfrontamento directo de infarto para decidir o campión da liga.
A historia de paralelismos entre estes dous equipos comezou cando ambos remataron campións dos seus respectivos grupos de 3ª división. Enfrentáronse no torneo de campións e remataron emparellados no mesmo grupo de 2ª. Esa tempada, ambos remataron en metade da táboa, 5º o Eloy e 7º o DCM. O ano pasado, ambos conseguiron o ascenso á máxima categoría, o Parquets quedou campión e os nósos segundos.
Este ano continúa a historia de paralelismos pero levada á máxima expresión; o obxectivo de ambos equipos volve coincidir; esta tempada toca loitar pola permanencia. Pero ademáis, ambos chegan co mesmo número de puntos, de victorias, empates e derrotas, mesmo golaverage xeral e mesma traxectoria (melloría nos últimos encontros).
A única diferenza estatística entre ambos é que o P.Eloy domina o cómputo xeral dos duelos directos entre ambos equipos. Venceu ó DCM no torneo de campións, nos dous enfrontamentos da tempada 2009 e na ida da tempada pasada. Na volta, o DCM logrou por primeira vez vencer ós amarelos cun axustado 3-2.

Pero ademáis desa rivalidade histórica, nesta xornada hai en xogo tres puntos fundamentais para ambos clubes. 3 puntos que permitirían ó vencedor, rematar a primeira volta cun notable e ó derrotado cun aprobado raspadiño. 3 puntos que significan un colchón de tranquilidade con respecto ó pozo.

En defintiva, agárdonos un partidazo.

O P.Eloy terá unha baixa por acumulación de cartóns, pero dispón dun amplo plantel para suplila. En anos anteriores, o peso do equipo recaía no Vasco, un xogador temido polos nósos nestes enfrontamentos. Pero esta tempada, un dos seus homes máis novos, Jorge, explotou como un dos xogadores máis decisivos desta liga, botándose o seu equipo ás costas e sendo imprescindible para o Eloy durante todos os minutos de cada encontro.
O DCM deberá prestar especial atención a estes homes, pero sen dúbida, o que realmente buscará o equipo será que sexa o rival quen teña que preocuparse do xogo e dos xogadores dcmistas e non ó revés.
Se os nósos xogan ó alto nivel que acadaron encontros atrás, poderán saír vencedores, pero calqueira factor que baixe un ápice ese nivel, pode servir en bandexa o encontro para os amarelos.

A resolución deste partidazo o DOMINGO ÁS 19:00 HORAS NO PAVILLÓN DE LAVADORES, AGARDÁMOSVOS!

“Unha parte para cada equipo e reparto de puntos” DCM 2¬2 NovoVidal

O DCM salva un importante punto nun encontro no que aproveitou a relaxación inicial de Novo Vidal e o seu alto nivel de confianza para irse cun 2-0 ó descanso. Na segunda metade o equipo amosou estar todavía moi verde para aspirar a algo máis que a permanencia e ante a reacción do 5º clasificado, rematou pedindo a hora.

Debutaba o DCM en partido oficial no pavillón do Berbés nun encontro difícil pero non imposible trala melloría dcmista nas últimas datas.
O rival, NovoVidal, segundo equipo menos goleado da división, saía algo relaxado, e o DCM aproveitouno para ter as mellores ocasións da primeira metade.
Esas ocasións chegaron máis por forza que por xogo, e é que a maior parte delas foron de saque dende o curruncho. Dispuxo dun gran número de corners o equipo e sendos rexeites ós lanzamentos e estivo moi preto do gol en máis dun deles. Errou un feixe pero acabou anotando un, subindo o 1-0 ó electrónico; Yago sería o goleador.
Seguíu traballando o equipo, e NovoVidal non daba reaccionado.
O segundo tanto dcmista sí que chegaría tirando dunha xogada de toque, dunha das xogadas nas que se traduce a melloría do equipo nos últimos partidos e que hoxe apenas empregaron. Lanzaba a porta o Novo Vidal, o rexeite quedaba para Vare quen optaba por confiar na saída en curto en lugar do pelotazo. Emi controlaba con seguridade en banda, xogaba de novo para Vare e marchaba cun gran desmarque en velocidade dando opción ó pase ó oco do defensa dcmista. Pani acompañaba pola banda contraria, Emi servíalle un pase da morte, pero o disparo de Pani petaba na madeira, por fortuna o rexeite caía para Emi quen enviaba ás redes un contragolpe de luxo. 2-0. Chegábase ó descanso.

Novo Vidal cambiou na segunda metade. Optou pola presión en toda a cancha e iso afogou ó DCM, amosando que aínda que o equipo é mellor neste 2012, ten todavía moitas carencias. Aguantou ben o DCM os primeiros quince minutos, pero apenas tiña posesión de balón e non conseguía saír en contragolpes. NovoVidal atopábase co 2-1 tras un córner moi mal defendido polos nósos. E minutos despois, chegaría o empate tras unha perda de balón en ataque e un grave erro de entendemento entre Vare e Xmon que deixaban só ó atacante rival, 2-2. Ese gol acabou de reactivar ós visitantes e acabou de afundir ós Dcmistas que comezaron a ter erros propios das primeiras xornadas. Saques de banda co equipo mal colocado que xa costaron máis dun gol noutros partidos, precipitación na saída de balón, incapacidade para recuperar un só balón, lentitude á hora de baixar a defender e iso provocou que o rival comezara a atopar moitos ocos e dispuxo de clarísimas ocasións. De ahí ó final outro bo feixe de ocasións para NovoVidal, pero a madeira salvou ós nósos en ata tres ocasións e impedíu que o marcador se movese.

Observando os resultados que nos deixa a xornada, o punto sumado, adquire unha importancia vital. Era un punto inagardado na teoría, xa que enfronte estaba un dos mellores equipos da liga, pero tralo 2-0 inicial, as sensacións ó rematar o partido eran agridoces. A victoria estivo no peto, pero ó final acabou moito máis preto dos visitantes.

Este é o punto número 15 para os dcmistas, que deixa a clasificación apretadísima. ParquetsEloy venceu a Jesús Cao e tamén chega ós 15 puntos, ó igual que Wapichi que empatou con Urba os Cabazos. Só 3 puntos separan a estes equipos do descenso (a falta de xogarse o Xestas-T.Cahersa).
Isto fai que o vindeiro partido ante o P.Eloy adquira máis importancia se cabe. Ambos equipos chegan cos mesmos puntos e o mesmo número de victorias, empates e derrotas. Incluso empatan no golaverage xeral -4.
Fermoso partido o que nos agarda. Ata entón boa semana a todos!

"A melloría dcmista, a exame" DCM - NovoVidal

A penúltima xornada da primaira volta, enfrontará a un motivado DCM contra o 5º clasificado da división, un Novo Vidal que é ademáis o segundo equipo menos goleado da categoría. Difícil exame para os nósos, que amosará ata onde chega a melloría dcmista das últimas datas.

O Novo Vidal, rematou oitavo clasificado na tempada pasada, aínda que cunha sanción de -6 puntos por incomparecencia. Chega a este encontro tras tres victorias consecutivas, pero deixouse puntos importantes anteriormente tras caer ante Xestas e UrbaOsCabazos, agardemos que tamén o faga ante o DCM.

Os nósos chegan pletóricos de moral tralo seu último gran encontro ante Navia Fs que os afastou dos postos de descenso. Aínda así, o equipo segue demasiado preto do pozo, e debe seguir sumando para non xogar con fogo.
Neste 2012, o DCM deu mostras dunha gran melloría, pero non sabemos se será suficiente para derrotar a equipos punteiros da división como é o NovoVidal. Saberemos a resposta o domingo ás 10 no pavillón do Berbés.
O equipo podería contar para este partido con todos os seus xogadores por primeira vez na tempada. Jorge estará baixo paus. Quique será fixo na defensa. Vare tamén entrará seguro na convocatoria aínda que seguirá con molestias no dedo mancado a semana pasada. Chape e Xmon tamén poderían estar a disposición se non hai novidades para completar a parcela defensiva. Arriba, moito potencial ofensivo, Pani, Pablo, Emi e Yago.

¿Será suficiente a melloría Dcmista para sacar puntos ó 5º clasificado?
Non perdan a resposta o domingo ás 10h no Berbés.

Saúdos!