“Primeira derrota da tempada” DCM 1-6 Pan.Trav.deVigo

O choque contra o rival máis forte dos que se mediron no que vai de tempada co DCM, chegou no peor momento, nunha xornada onde o equipo só contaba con 6 convocados, todos de corte defensivo e entrando un deles na convocatoria a última hora, forzando o seu regreso tras unha lesión polas necesidades do plantel. Significaba o estreo do equipo no Pavillón de Candeán, un moderno e vistoso complexo, con pista de tarima flotante e grandes dimensións (o que tampouco beneficiou hoxe ós nósos)

O rival, descendido da 1ª división na tempada pasada co DCM, é un claro favorito ó ascenso se mantén o nivel competitivo de onte, onde buscaron a vitoria de principio a fin, amosando moita ambición, non só en conseguir os 3 puntos, senón tamén en desplegar un atractivo xogo e anotar o maior número de goles posibles.

A pesares do avultado do resultado final, os nósos amosaron nos primeiros compases de partido, que en situacións normais, poderían ter plantado cara a este poderoso equipo e ter opcións no encontro; e é que os primeiros minutos foron dominados polo equipo rosiña que tentou achegarse con perigo á portería rival. Selu fixo bos movementos nestes compases iniciais na posición de pivot, pero unha concienciada defensa rival o derrubaba cada vez que conseguía encarar a porta rival; de feito, o DCM gozou de varios lanzamentos de falta nestes primeiros minutos de partido, pero non tivo fortuna. Ó igual que tampouco a tivo no primeiro lanzamento a porta do Trav. De Vigo, quen conseguiría o 0-1 dende fóra da área tras un lanzamento que non ía entre os tres paus, pero qeu petaba o xusto nun defensa dcmista para acabar en gol. 0-1.

O cansazo que comezaban a acumular os xogadores Dcmistas, obrigou ao equipo a retrasar a súa liña de presión habitual ata o medio do campo, agardando que o rival cometese algún erro que permitise contragolpear. Pero hoxe enfronte estaba un rival moi mentalizado, que soubo medir perfectamente os tempos e non caer no que pretendía o DCM.

Así, con vantaxe no marcador, amosou non ter ningunha présa en atacar, e non ter o máis mínimo problema en tocar e tocar o esférico tanto coma fixese falla no seu propio campo, e ademáis amosou que tiña calidade suficiente para facelo sen cometer ningún erro.

Esta situación botou por terra as opcións dcmistas. E é que estando por debaixo no marcador, e observando que o rival non ía a arriscar o máis mínimo, os nósos estaban obrigados a abandonar esa idea defensiva e ir a buscar o balón a campo contrario. Isto multiplicou o cansazo e levou a cometer moitos erros defensivos que o Travesía de Vigo ía a aproveitar.

Aínda así, o DCM todavía gozaría de boas ocasións na primeira metade para anotar, pero non tivo fortuna de cara a porta, e pola contra, o rival, nos escasos achegamentos desta primeira metade, tivo moitísima efectividade ata conseguir o 0-3 co que se chegaría ó descanso.

A segunda metade xa foi outra historia. Agora sí que os visitantes gozaron de numerosísimas ocasións de gol, moitas delas clarísimas, pero ao contrario que nos primeiros 25minutos, agora era a fortuna a que lles negaba a eles o gol e concedeuno ao DCM nunha boa xogada entre Davo e Selu. 1-3. E todavía tería outra opción clara de gol o DCM para anotar o 2-3, pero errou, e na xogada seguinte chegou o 1-4 que finiquitou o partido.

Quedaban moitos minutos para o final e o DCM foi consciente de que non tiña forzas para remontar tal marcador. Deixouse levar; debería ter esquecido o electrónico e centrarse en non encaixar máis goles; pero iso é sinxelo de dicir e difícil de facer e máis cando as forzas xa non respondían a moitos xogadores. Jorge (que tivo máis traballo que en todo o que vai de tempada), e os erros do Travesía evitaron que a goleada fose maior.

Por se iso fose pouco, o colexiado Eladio castigaba todavía máis ós Dcmistas cunha tarxeta que puido evitar; tirou demasiado de reglamento para amosar cartón amarelo a Selu por obstaculizar un saque de esquina do rival (é certo que non estaba á distancia regulamentaria, pero máis por inercia e cansazo de quedarse no sitio tras enviar o balón a córner, que por impedir o saque, xa que nin o rival obtiña vantaxe por sacar rápidamente nin o DCM gañaba nada cunha nova perda de tempo).

Esta derrota saca ós dcmistas dos postos de ascenso directo, mais non afectou moito á moral do equipo, e é que onte pouco máis podían facer para evitar a derrota.

A boa noticia foi o regreso de Xmon, e con boas sensacións no seu xeonllo.

A pensar xa na vindeira xornada. Un saúdo!

Duelo No Cume da Liga e da Madroa. DCM Vs Panadería Travesía de Vigo

Moi bos días/tardes/noites benqueridos lectores

Unha semana máis nos atopamos neste blog para analizar o que vai a ser unha interesantísima xornada de liga para o DCM, xa que vaise a enfrontar co Travesía de Vigo.

Nada máis e nada menos que estamos a falar do terceiro clasificado na liga, con tan só un punto menos que o equipo rosiña por mor da súa derrota ante o colider da categoría o Bar Luada II (6-9). Polo tanto como podemos observar se trata dun equipo temíbel que so deu o seu brazo a torcer na segunda xornada de liga cando lle tocou loitar co líder da categoría. Analizando máis polo miúdo os seus números vemos que leva 5 vitorias, destacando o 0-6 que lle endosou ó faroliño vermello da categoría, o Bar Lobishomi. Tamén podemos fixarnos que nas dúas últimas xornadas so foi quen de gañar os seus partidos pola mínima, xa impúxose 1-2 ó Cafetería Zaida (único equipo ata o momento que conseguiu roubarlle punto ó DCM) e a pasada xornada 4-3 ó Camping Cangas (equipo ó que o DCM gañou por 2-0). Se falamos de goles anotados leva 4 goles máis que o DCM (24) e 5 máis na contra (14). 

Pero neste partido máis que ó rival debemos analizar a difícil situación na que chega o DCM a este partido, xa que non contará con ningún atacante puro para o mesmo. Ás baixas habituais, nestas datas, de Yago e Quique, súmaselle a de Pani pola súa viaxe a Donostia, e a de Emi que salvo novidade de última hora non será da convocatoria por mor dun cólico no ril, que salvo mellora milagreira nas vindeiras horas provocará que sexa baixa para o partido. Ademais a todo este listado de baixas hai que sumarlle a dúbida de Xmon quen mancouse fai dous partidos no pavillón da Etea ante o Endulco e que aínda non se atopa 100% recuperado. Polo tanto a convocatoria do DCM preséntase moi escasa e chea de homes defensivos. Jorge estará na portería, Chap, Selu e Vare como homes para a parcela defensiva e tan só Davo para os postos atacantes, un Davo que o ano pasado ocupaba posicións máis retrasadas. Polo tanto difícil papeleta, e nun dos peores partidos posíbeis, a que terán que afrontar os 5 ou 6 gladiadores que saian ó terreo de Xogo.

Pero non todo é negativo neste partido. O DCM ven de demostrar a pasada xornada que é un equipo con moito oficio e moi traballado, nun agreste e difícil partido ante o Explanada FS, conseguiu levarse os tres puntos, nun tipo de encontro que o ano pasado tería perdido. Polo tanto este ano o equipo sabe xogar este tipo de partidos e ten máis experiencia e confianza para superar momentos complicados. A isto hai que sumarlle que o DCM é un equipo experto en xogar estes encontros, con equipos da zona alta da táboa, con poucos xogadores na convocatoria e soe sacar un bo rendemento. Na retina dos nosos seguidores están aqueles partidos na terceira división cando se xogaba o liderado contra o primeiro clasificado naqueles intres e onde o equipo sacaba o mellor de si mesmo para sacar adiante os 3 puntos. A clave será polo tanto que o equipo sexa fiel ós seus instintos máis básicos e planee un partido moi serio dende a defensa, tratando de aproveitar unha das súas rápidas transicións. Para isto o equipo conta cos mimbres máis axeitados xa que, como comentamos con anterioridade, todos os membros da convocatoria teñen un perfil marcadamente defensivo. Agora so falta que os xogadores sexan conscientes da importancia que teñen cada un deles, e que saiban que dando o 120% e cunha concentración digna dun xogador de xadrez o equipo poderá afrontar con garantías o partido desta fin de semana.

Este reto tan bonito que se lle presenta ó equipo rosiña, disputarase no novo pavillón de Candean. Se fai dúas semanas o equipo debutaba na ETEA, esta semana o fará no novo espazo deportivo cercano ós campos de adestramento do Real Club Celta na Madroa. Para chegar alí recomendamos a seguinte ruta

- Coller a Avenida do Aeroporto

- Avanzar nela ata chegar ó cruce de subida ó Vigozoo.

- Seguir as indicacións do zoo ata que chegue o cruce dos campos deportivos (Veranse os campos despois do cruce a esquerda) nese cruce seguir recto, ata que uns metros máis adiante verase a asociación de veciños detrás da cal se atopa o pavillón de Candeán.

(máis abaixo indicacións gráficas)

A hora do partido ás 14:00 horas do domingo, unha hora un tanto complicada pero é un partido que ben merece un esforzo, ademais máis que nunca o DCM necesita o teu alento. 

Lino contaranos todo o acontecido neste partido. 

 - XaimeRuta dende a Avda do Aeroporto

- Cruce na Avda do Aeroporto (coller a subida á esquerda)

 - Cruce cos campos deportivos do Celta (seguir recto)

  - Chegada a Asociacións de Veciños de Candeán (O Pavillón está detrás)

- Fachada e Interiores do Pavillón

Fotos Cortería de Faro de Vigo, Google e Estudios Naos Arquitectura

Clasificación Xornada 6: Forte competencia na parte alta

O DCM mantense segundo clasificado grazas a súa vitoria ante o Explanada FS. Grazas a ese resultado consigue seguir o forte ritmo importe polo Bar Luada II, quen obtivo idéntico resultado que os nosos no seu partido contra o Bar Lobishomi. Por outra banda os perseguidores máis directos tamén siguen pisando forte. O Panadería Travesía, vindeiro rival do DCM, logrou unha axustada vitoria por 4-3 ante o Camping Cangas. O Tapería Ouxo logrou imporse ó Cafetería Zaida por 4-2. Por último o Avistas de la Arena acadou unha solvente vitoria por 4-1 ante o Bar Secundino.

O DCM grazas a estes resultados sitúase xa en solitario como o equipo menos goleado, con 2 goles menos encaixados que os seus perseguidores, o Tapería Ouxo e o Explanada ambos con 11 goles encaixados.

“O mellor arranque da historia” Explanada 4-2 DCM

O DCM continúa superando dificultades e obstáculos e supera con creces as expectativas máis optimistas que puideran existir sobre este inicio de tempada.

Onte, con moitas baixas e ante un rival cun potencial moi superior ó que reflicte a táboa clasificatoria, os nósos souberon sufrir por momentos para acabar, contando co chisco de fortuna necesario, vencendo un encontro de enorme dificultade. Nesta ocasión a nota negativa chegou en forma de cartón amarelo.

O choque comezou con Jorge baixo paus, Vare e Selu en posicións defensivas, Emi e Pani máis adiantados e Chape como único recambio dos rosiñas. O rival, cunha numerosísima convocatoria, comezou amosando o seu poderío dende o quecemento; con exercicios marcados e preparados pola figura dun adestrador que lideraba ó Explanada Fs.

Tamén comezarían intimidando tralo pitido inicial. O explanada sacou de centro e comezou a mover o esférico con moitísimo criterio; os seus xogadores tocaban e desmarcábanse, tal e como marcan os cánones deste deporte e que tan poucos equipos son capaces de aplicar.

Pero iso, se ben transmite ós dcmistas unha sensación de respeto polo rival e de saber que o encontro non vai ser sinxelo, só ven a reafirmar o sistema posicional dos nósos. Nestas situacións o único que podes e debes facer é o que sabes, nin máis nin menos. E así, pouco a pouco o rival deuse conta que non era suficiente con esa rápida circulación de balón para lograr desaxustes defensivos nos Dcmistas, que non só foron diluíndo esa sensación de poderío dos rivais, senón que foron os encargados de crear as primeiras ocasións de perigo do partido.

Así chegaría un tiro libre directo favorable ós rosiñas na frontal da área do Explanada, que Emi encargaríase de transformar conectando un preciso lanzamento que introducía o esférico polo único oco posible. 0-1.

Tras ese gol, semellaba o momento perfecto para que o DCM durmise o partido, deixase pasar minutos e observase como se adaptaba o rival a ir por detrás no marcador. Pero dous erros, propiciaron a remontada local sen demasiado esforzo.

O 1-1 chegou no primeiro disparo a porta do Explanada, nunha xogada aparentemente controlada, pero que sorprendía polo primeiro pau ó cancerbeiro Dcmista (que chegaba con algunhas molestias físicas ó encontro).

E pouco despois, tras un saque dende o curruncho, erraba o posicionamento defensivo e o Explanada facía o 2-1.

Partido moi costa arriba para o DCM.

Pero entón, os trocos con Chape comezaron a dar osíxeno ó equipo, e un deses cambios, levou a Selu a situarse na posición de pivot; feito que sorprendeu á defensa rival, e no primeiro esférico que recibíu, o xa pichichi dcmista, anotaba a igualada. 2-2.

E intres despois, Vare volvía a buscalo na mesma posición e tería unha nova oportunidade noutro fantástico movemento de costas á porta rival, que deixáballe nun man a man, pero o cancerbeiro rival estivo rápido e desvaratou a xogada.

Liaríase despois o encontro, tras unha entrada innecesaria do propio Selu en campo contrario que o colexiado resolvía con cartón amarelo. Pero a xogada non rematou ahí, o Explanada esqueceuse entón do partido e estivo máis pendente nos minutos seguintes de tentar provocar ó propio Selu con entradas innecesarias e de protestar continuas accións ó colexiado.

O DCM soubo ver entón que era importante aguantar este marcador ata o descanso. O propio Selu retirouse uns minutos para evitar males maiores, e o quinteto sobre o campo da vella escola dcmista soubo enfriar de novo o encontro.

E con este sorprendente 2-2 (prevíasen moitos menos goles) chegábase ó tempo de refrixerio. 

O partido non semellaba sinxelo para os Dcmistas, e de feito, tocaría sufrir máis durante esta segunda metade, no que o Explanada inquedou moito máis a portería de Jorge, quen respostou a tódolos lanzamentos, contando tamén cos paus da súa meta.

Pero de novo, o DCM sairía desta difícil situación centrados únicamente no que mellor saben facer, defender moi ben colocados.

A situación cambiaría nunha cesión totalmente innecesaria dun defensor dos locais ó seu porteiro que recibía coas mans. O colexiado a asubiaba e o DCM non desaproveitaría a ocasión. De novo sería Selu o goleador cun lanzamento raso tralo saque indirecto da xogada. 2-3.

Aguantaría defendo uns minutos máis o DCM e a falta de 6 para o final, solicitaba un tempo morto. Tras regresar de dita interrupción, os nósos aproveitaron que o rival regresaba ó partido algo despistado e trenzaron unha fermosa xogada que en 4 toques transformábase en gol. Vare sacaba de banda para Emi; éste buscaba a Pani pegadiño á liña de cal, e polo carril contrario incorporábase Selu para recibir unha grandísima asistencia de Pani e facer tras regatear ó porteiro o 2-4 que sería definitivo. Significaba tamén o segundo hattrick consecutivo do xogador Dcmista.

Así finalizaba un encontro que vén a amosar o bo momento dcmista, que non só sabe ó que xoga, senón que sabe sufrir por momentos sen perder a compostura, agardando que ese chisco de fortuna que de momento os acompaña aparezca (hoxe en forma de cesión), e que fai que vaian xa 6 xornadas sen coñecer a derrota.

En partidos como este, onde a convocatoria é moi xustiña e os esforzos deben multiplicarse, gústanos destacar individualmente a cada xogador. Fantásticos todos onte, Jorge, Chape, Selu, Vare, Pani e Emi, noraboa!

Xaime informaralles de cómo chega o equipo a buscar prolongar a xeira unha semana máis.

Escasos Efectivos Escasos Goles. Explanada F.S. Vs Deportes Carlos Miguel

Moi bos días/tardes/noites benqueridos lectores

Esta semana vamos analizar o que se prevé un axustado partido entre o Explanada F.S. e o Deportes Carlos Miguel.

Como é xa habitual comezamos a nosa análise polo que vai a ser o rival do DCM, un equipo que comparte co equipo rosiña a honra de ser o equipo menos goleado do que vai de campionato (7 goles en 5 partidos). O Explanada F.S. ó igual que o DCM e o Ars Canis, tamén conta cunha páxina nas redes sociais, máis en concreto en Facebook (https://www.facebook.com/pages/Explanada-FS/122874924437908). Nela podemos atopar que son un equipo que analiza profundamente as estatísticas de xogo. Nas fotos do Facebook podemos atopar infinidade de información sobre os partidos xogados por cada xogador, os goles marcados por cada quen, as estatísticas por terreo de xogo etc. Precisamente se nos vamos ó apartado de partidos xogados en Balaídos polo Explanada atopamos que dende a temporada 2007/08 e ata a pasada campaña, xogaron tan só 5 partidos nas pistas do municipal vigués, onde obtiveron tan só 6 puntos, con 2 victorias e 3 derrotas. Se nos vamos as estatísticas do ano pasado, poderemos observar que se trata dun equipo máis perigoso do que indica a clasificación desta temporada, xa que na 2012/13, o equipo quedou terceiro clasificado, moi por encima do cuarto, con  14 partidos gañados, 4 empatados, 3 perdidos, 68 goles a favor e 49 en contra. Como podemos observar o ano pasado o equipo tamén tivo unha cifra notábel en canto ós goles encaixados xa que en 25 partidos encaixou 49, converténdose no terceiro equipo menos goleado da categoría. Nesa fortaleza defensiva e onde baseou os seus bos números, xa que ata 5 equipos quedaron por riba do Explanada FS en canto a goles anotados. Este ano o equipo non comezou de todo ben, xa que ata a xornada pasada non gañara ningún partido. Ata o momento, o equipo leva 1 vitoria (a conseguida a semana pasada ante o Camping Cangas por 0-3), 2 empates (os acadados ante Bar Secundino e Cafetería Zaida ambos por 2-2) e dúas derrotas que son dignas de mención, xa que tan só perderon por un gol ante rivais moi complicados, como son o Bar Luada II (actual líder) ante o que perderon por 2-1 e o Cafetería Danais (1-0 como resultado final). O noso rival leva ata o de agora 8 goles a favor e 7 en contra. 

Polo tanto rival moi complicado sobre todo polos seus moi bos números defensivos, ó que se vai enfrontar o colider da categoría o Deportes Carlos Miguel. O DCM chega a este partido, por se non fose pouco coa dificultade do rival, con moi poucos efectivos. Se a semana pasada o equipo contaba co seu 9 de gala (tendo en conta que Quique tan só acudirá a partidos en Nadal), esta semana o equipo contará con 6 xogadores, un dos cales, Chap, chegará minguado fisicamente por mor dun proceso gripal. As baixas son as producidas pola volta de Yago a Manresa por mor dos seus estudos, a baixa de Davo por unha viaxe a Madrid e a de Xmon pola lesión sufrida nos derradeiros instantes do último partido do DCM.

A pesar destas dificultades o equipo chega coa moral moi alta tras asolagar ó seu rival a pasada xornada. O equipo por fin foi quen de acadar unha goleada e de mellorar os seus números ofensivos. Aínda que o equipo errou algunha ocasión clara de gol, o certo que e mellorou, e moito, a súa efectividade de cara a portería, o que lle permitiu por primeira vez vivir con certa tranquilidade a segunda parte dun partido que rematou gañando por 7-2. Precisamente froito desa tranquilidade e certa relaxación chegaron os dous goles do rival, que acurtou distancias do 5-0 ó 5-2. Isto ten que por en alerta ó equipo rosiña para que non volva a acontecer no partido desta fin de semana, xa que o equipo xogará contra un rival que sabe aproveitar moi ben os seus goles, polo que será moi importante saír coa máxima concentración posíbel, para evitar que o Explanada póñase por diante no marcador, e é que como ven din os números de ámbolos dous equipos, o equipo que golpee primeiro terá moitas posibilidades de obter a vitoria. Neste senso os xogadores DCM'istas deben de estar confiados, xa que en tódolos partidos foi quen de pórse por diante no marcador, pero esta confianza non se debe traducir en relaxación, senón nunha maior intensidade e seguridade para seguir mantendo esta estatística, nun partido especialmente crucial. 

A convocatoria para esta xornada é por tanto a de Jorge na portería, Vare, Selu e o agripallado Chap para as posicións defensivas e Emi e Pani para as posicións ofensivas. Agardemos que a pesar desta curta convocatoria o equipo saque a súa casta que lle permite en ocasións coma esta facer moi bos partidos compensando a falta de descanso con elementos como a concentración, a garra e a intensidade.

O partido será no Estadio Municipal de Balaídos, desta ocasión na pista número 2 (entrando pola porta 18 do estadio a esquerda). A hora a mesma que a semana pasada no Pavillón da Etea, o sábado ás 17:00 horas da tarde. Un prometedor partido que se presenta moi interesante e que convertese no centro neurálxico da nosa atención unha vez que esta semana non hai liga na primeira división.

Toda a información do partido neste blog da man de Lino.

O DCM Sube un Chanzo na Clasificación

O DCM consigue trala súa vitoria situarse na segunda posición da táboa clasificatoria tralo tropezo do Tapería Ouxo ante o Cafetería Danais (2-3). Desta forma o equipo DCM'ista sitúase colider co Bar Luada II e son xa os dous únicos equipos que non coñecen a derrota, xa que esta xornada perderon o Tapería Ouxo e o Cafetería Zaida os outros dous equipos que se mantiñan invictos.

Ademais o DCM sigue sendo o equipo menos goleado, aínda que esta xornada comparte as honras co Explanada FS, vindeiro rival dos nosos, e que conseguiu a súa primeira vitoria no que vai de campionato, tras impoñerse por 0-3 ó Camping Cangas. Polo que se preve un partido moi axustado a vindeira fin de semana.

Outro partido a destacar e a axustada vitoria do Bar Luada II ante o Avispas de la Arena, por 6-5, que lle permite situarse na primeira posición da táboa clasificatoria. Por último destacar a primiera vitoria na liga do Vet. Ars Canis lograda ante o colista Bar Lobis Home, que queda como único equipo sen puntuar, por 2-4.

Para ver a clasificación máis pormenorizadamente premer AQUÍ

"Mellorando dende as vitorias" DCM 7-2 Endulco

O DCM iniciou un novo bloque de 4 encontros (antes dun novo parón vacacional) cunha nova vitoria e mellorando a imaxe dos dous últimos partidos que incrementaran o nerviosismo en certos sectores do clube. Os únicos puntos negativos, unha posible lesión de Xmon na derradeira xogada do encontro (que agardemos se quede nun susto) e os dous goles encaixados. 

Agora, coa marcha de Yago e con posibles baixas esporádicas, o equipo deberá amosar que tamén sabe sobrevivir con convocatorias moito máis reducidas como fixo no debut da tempada.

A 5ª xornada de liga deixounos a particular inauguración dos Dcmistas da pista da Etea, un complexo renovado e vistoso que semella estar moi desaproveitado. Como xa dicía Xaime na Previa, ao equipo gústalle xogar nestes fermosos pavillóns, crécese e adoita acadar bos resultados. Iso sucedeu onte na Etea, onde ante un rival que asustaba tralos informes dos oxeadores do clube, os rosiñas saíron máis metidos que nunca no encontro, cunha presión nos compases iniciais que deu a clave de cómo saír vitoriosos do choque. 

Como é costume o primeiro tanto tardou moito en chegar e o equipo tivo que errar un bo feixe de ocasións antes de que os 7 tantos anotados hoxe comezaran a subir ó electrónico.

Foron 4 na primeira metade (4-0 ó descanso) e 3 máis no segundo tempo ata o (7-2 definitivo); resultado abultado pero que todavía puido ser máis amplo en ambos casilleiros, xa que ambos equipos erraron boas ocasións de gol. Anotaron Davo, Emi, dous Yago, e hattrick de Selu que o sellou cun gol de chilena que deixou a todos boquiabertos.

Todo iso foi posible grazas a esa boa presión que comentabamos e a un bo xogo combinativo no que hoxe debemos destacar tamén, xunto cos goleadores, a Pani, quen non anotou pero estivo presente en gran parte deses tantos, facendo asistencias de moitísma calidade. Boas sensacións transmitíu tamén Chape, quen vai collendo minutos que lle irán dando ritmo e confianza.

A pesares do amplo do resultado o encontro non foi sinxelo e requeríu o traballo dos Dcmistas durante os 50 minutos. Na primeira metade para lograr que os goles que se resistían chegasen e no segundo tempo para que a intensidade non baixase, e aínda que houbo minutos nos que o Endulco mellorou e creou perigo, o DCM soubo respostar retomando a presión e cun bo facer defensivo, no que destacaron os homes avanzados do equipo, que traballaron arreo. Tamén supuxo unha dificultade no día de hoxe entender o criterio arbitral dun colexiado que non estivo demasiado acertado, aínda que por fortuna a amplitude do resultado fixo que o seu papel non fose determinante.

Estaremos atentos a ver como se traduce esta vitoria na clasificación; estarán informados a través do blog e das redes sociais do clube. Asimesmo, tentarase informar tamén de como evoluciona o xeonllo esquerdo de Xmon nas vindeiras horas ou na Previa de Xaime Estévez. 

Destacar e agradecer a ampla presenza de afeccionados Dcmistas no encontro de onte, no que non puideron desfrutar tanto da vitoria por ter que ver o partido dende un fondo ao non estar aberta a bancada do pavillón... de ahí ese "desaproveitamento" do que falabamos destas fermosas instalacións; un pequeno erro máis a sumar ao paupérrimo traballo dos políticos deste país.

Iso é todo polo momento. Desfruten da vitoria e ata a vindeira semana. Un cordial saúdo.

Debut na Etea. Deportes Carlos Miguel Vs Endulco SL.

Moi Bos Días/Tardes/Noites benqueridos lectores.

Tralo parón por mor do Samaín, atopámonos unha semana máis neste medio de difusión para falar do que vai ser o partido desta fin de semana, que enfrontará ó Deportes Carlos Miguel co Endulco S.L.

O Endulco SL é o equipo patrocinado pola empresa sita na cidade de Pontevedra e que se dedica a mantementos e pinturas industriais e a servizos "Offshore" da industria petrolífera. O ano pasado situose na zona morna da táboa clasificatoria rematando a liga oitavo, con 11 partidos gañados, 2 empatados e 12 perdidos, 74 goles a favor e 76 na contra. Polo tanto polo que se pode observar polas estatísticas da temporada pasada trátase dun equipo equilibrado e que este ano sigue uns parámetros similares, xa que se atopa na novena posición con 1 partido gañado, 1 empatado, 2 perdidos, 11 goles a favor e 14 na contra, é dicir, a pesar de ter 6 puntos menos que o cadro rosiña leva dous goles máis marcados, polo que a defensa do noso equipo deberá estar alerta. Se analizamos os 4 partidos de liga que leva disputado o equipo da Cidade do Lérez, poderemos observar que tan só perdeu un partido por goleada. Na primeira xornada caeu derrotado por un axustado 2-1 ante o Bar Secundino 10º clasificado actualmente, na xornada dous chegaría a maior goleada recibida e é que o Endulco caería por 1-6 fronte ó Cafetería Danais (rival que caeu por 3-2 ante o DCM no primeiro partido). Na seguinte xornada lograría un empate contra o equipo que máis igualadas leva na competición (3 en 4 partidos) o Cafetería Zaida (3-3) e na última xornada, no partido que se disputou en Balaídos-1 despois do encontro do DCM, lograron vencer por 6-3 ó Camping Cangas (rival ó que o DCM venceu por 2-0). Nese partido uns enviados do equipo rosiña estiveron analizando o devir da primeira metade na que puideron analizar que o Endulco ocupaba unha posición na táboa clasificatoria inferior á que realmente merecería polo xogo despregado neste partido.

Pola súa banda o DCM chega ó partido invicto no que vai de liga tras sumar nas 4 xornadas disputadas 10 puntos, grazas ás súas 3 vitorias e 1 empate. O equipo nestes partidos ven de amosar uns moi bos números defensivos xa que leva 5 goles encaixados, ou o que é o mesmo, 1,25 goles recibidos por partido, unha cifra moi positiva para un equipo de fútbol sala. Porén isto non debe facer esquecer que houbo fases nalgúns partidos onde o equipo perdeu a orde e os rivais puideron ter aproveitado para marcar algún gol máis. Na faceta ofensiva é onde os números do equipo son mais exiguos pero suficientes, o equipo rosiña leva 9 goles a favor o que se traduce en 2,25 por partido, e é que tan só un gol dos que marcou o DCM non tivo un resultado directo en forma de puntos. No primeiro partido foron necesarios os 3 goles para sumar os tres puntos fronte ó Cafetería Danais, no segundo os 2 goles anotados conseguiron contrarestar ós dous tantos do Cafetería Zaida e a partir de esta xornada o DCM reduciu a cantidade de goles recibidos que de aquela era de 2 por partido. Na terceira xornada gañou por 2-0 co que houbo un  gol que lle sobrou e na última xornada gañou por 2-1 polo que tódolos goles foron necesarios. Porén se na faceta defensiva diciamos que os poucos goles encaixados non debían facernos esquecer certos momentos de inseguridade nalgún partido, na faceta ofensiva os escasos números ofensivos que presenta o equipo non deben levar a engano, xa que o equipo está a xerar multitude de ocasións en tódolos partidos, suficientes para ter marcadores máis avultados, pero as veces a mala fortuna e outras a mala puntería fan que o DCM pareza nos números un equipo máis cotroso do que realmente é.

Para este partido o DCM debe manter o seu rigor defensivo e a súa seriedade no terreo de xogo. Clave está sendo a intensidade coa que o equipo está entrando nos partidos, xa que en todos e cada un dos deles o DCM comezou gañando, e non houbo ningún momento no que o equipo rosiña fora por detrás do marcador. Traballar dende esta tranquilidade de fai que sexa mais doado manexar os tempos do partido, pero estamos seguros que no intre no que ó DCM lle toque loitar contra un marcador adverso será quen de afrontar con garantías o partido.

A convocatoria para este encontro, salvo novidade de última hora, estará formada por:  Jorge na portería, Xmon, Chap, Selu e Vare en posicións defensivas e Emi, Pani, Yago e Davo na parte máis adiantada do equipo. Este será o último partido de Yago ata o mes de decembro, xa que por mor dos estudos terá que desprazarse a Manresa durante un período aproximado de 6 semanas, agardemos que poida deixar ó equipo nas primeiras posicións e márchese cun bo sabor de boca en forma de asistencias, goles e resolucións defensivas.

O partido vaise a disputar nun campo ata o de agora descoñecido para os nosos, no Pavillón Municipal da Etea, anteriormente recinto dunha academia Militar, que foi reformado polo Concello e que ter unha superficie de parqué. Agardemos que como soe ser habitual nos nosos, debuten nun escenario de tal importancia cun bo resultado (como o fixeron no seu día no Pavillón Central de As Travesas ou no Pavillón Municipal de Navia). Para os máis despistados aquí van unhas lixeiras indicacións de como chegar ó pavillón

- Ou ben por Sanjurjo Badía ou ben pola Avenida de Bos Aires chegar ó Cruce da Guía, alí seguir en dirección Chapela (se se vai por Sanjurjo Badía isto supón seguir recto ó chegar o cruce da Guía se se vai por Bos Aires supón xirar a dereita), avanzar uns poucos metros ata ver  o primeiro semáforo despois do cruce, tralo cal estará o primeiro carril de incorporación á esquerda, unha vez xirado seguir recto pola Avenida da Mariña Española ata ver as antigas instalacións militares (máis abaixo pódese atopar un gráfico)

O partido xa o saben o Sábado ás 17:00 h, un perfecto aperitivo para o partido do Real Club Celta no Estadio Municipal de Balaídos fronte ó Raio Vallecano.

 

Imaxes Cortesía de Google Maps e Faro de Vigo