Moi boas tardes queridos lectores. En primeiro lugar quero agradecer a Lino que a semana pasada cubrise a miña baixa, xa que por mor de diversos compromisos profesionais non puiden acercarvos a actualidade DCM'ista como intentamos facer semana tras semana.Esta semana o DCM vai enfrontarse a un equipo xa coñecido polos nosos, e que todos recordarán polo famoso incidente do penalti. Fai dúas temporadas, cando o DCM militaba en 3ªC e o Cafetería Zeus (antigo Vanesma) tamén, na primeira volta unha acción provocaría que o partido se tivera que repetir a partir dun determinado instante da segunda parte. Foi unha cousa curiosa, o DCM gañaba o partido por 2-1, cando o colexiado do partido sinalou unha pena máxima a favor do Vanesma. O Vanesma marcaría o penalti, pero un xogador do equipo franxivermello adiantouse antes de tempo, e o colexiado anulou o gol e cedeulle o balón ó gardamallas do DCM. Porén a aplicación do regramento non foi de todo axeitada, xa que a decisión correcta tería sido anular o gol pero volver a proceder ó lanzamento de penal. O Vanesma presentou unha queixa e o comité decidiu repetir parte da segunda parte do partido (que o DCM tivo que xogar inmediatamente despois dun partido) con 2-1 no marcador e iniciándose o partido cun penalti a favor do Vanesma. O Vanesma marcaría o penalti e o resultado foi o mesmo que se non te tivese repetido o partido 2-2 no marcador. Na volta o partido xa non tivo este tipo de incidencias, e o DCM foi quen de gañar por 2-0, nun partido onde amosou unha forte seriedade defensiva e aproveitou e moi ben as súas oportunidades á contra.
O Cafetería Zeus chega a este partido nunha xeira moi negativa, xa que dos últimos 4 partidos perdeu 3 e tan só foi quen de derrotar ó colista da competición ó Bar Kubi. E é que o Zeus comezou moi ben a liga con 3 victorias consecutivas, pero a partir de aí foi desinflándose xa que nas seguintes 5 xornadas tan só obtería 4 puntos, iso si, un deles ante o actual líder da competición o Wapichi United. Con todo isto o equipo, que actuará como local esta semana, atópase na oitava posición con 5 puntos menos que os nosos, pero cun partido menos.
Pola súa banda o DCM chega a este partido coa intención de afianzarse nas primeiras posicións da táboa, e demostrar que a boa segunda parte feita a semana pasada non foi froito da casualidade. Ademais a necesidade de gañar acentúase tendo en conta que se o Zeus gaña ó DCM, na seguinte xornada, na que os nosos descansan, terían a oportunidade de pórse por riba dos nosos. Polo tanto 3 puntos moi importantes en xogo, tendo en conta que agora ven para o DCM un longo parón, que fará que estea case un mes sen competir (xa que non volverá a xogar até o 15/16 de xaneiro xa que ó equipo lle toca descansar a xornada posterior a reis- 7/8 de xaneiro). Unha vitoria ademais permitiríalle ós nosos acercarse ós postos de ascenso, xa que os dous primeiros clasificados xogan entre eles. O Wapichi e o Parquets Eloy mediranse nun bonito partido no pavillón do estadio municipal de Balaídos, onde sobre o céspede unha hora despois xogará o equipo referente da cidade, o Real Club Celta de Vigo.
Para este partido Ratkovic Varela poderá contar con case que tódolos seus efectivos. Xa inicialmente non hai ningunha baixa garantida. Seguro estarán (salvo incidencia de última hora), Jorge na portería, Vare, Pali e Xmon en defensa, Pani, Yago e Quique en ataque. Ademais e posíbel a presenza de Emi, quen xa se adestrou co grupo esta semana, e a de Chapela. Polo tanto podería darse o caso de contar cos 9 xogadores do plantel para este importante partido. Iso si, moitos destes xogadores chegan con certas molestias ó partido. Jorge non adestrou con normalidade por mor dunhas molestias nas cosas, que non deberían causarlle ningún tipo de problema durante o partido, Vare segue a recuperarse do seu problema nas costelas, Quique segue coas súas doenzas no pe que lle fan xogar cunha aparatosa protección interior e non lle permiten golpear con total comodidade e Emi aínda retornou os adestramentos esta semana, como xa sinalamos con anterioridade.
Polo tanto importante partido para o DCM, que terá unha boa oportunidade para pechar o ano cun sabor moi doce e pegadiño ós postos de ascenso á primeira división, uns postos que este ano parecen estar máis disputados que nunca xa que a igualdade na categoría é máxima. O partido xa o saben, o sábado ás 21:00 h no pavillón de Bembrive, unha magnífica hora para gozar do que vai ser, case de seguro, un gran espectáculo do fútbol sala de Vigo en Xogo. Non o perdan, o equipo lles necesita.
Aliñación probábel
------Jorge-------
--Vare-----Pali---
------Pani--------
------Yago--------
Banco: Quique, Xmon, Emi (?), Chap (?).
?= Dúbida
No hay comentarios:
Publicar un comentario